Gidawat ni kanhi Supreme Court Senior Associate Justice Antonio Carpio ang hagit ni Sen. Rodante Marcoleta alang sa usa ka pampublikong debate kabahin sa West Philippine Sea (WPS).
Ang hisgutan sa debate mao kung aduna bay legal nga West Philippine Sea ug kung lakip ba niini ang mga maritime features sa Kalayaan Island Group (KIG).
Nagsugod ang kontrobersiya human gipahayag ni Marcoleta nga posibleng “isurender” sa Pilipinas ang pipila ka bahin sa KIG tungod alang kaniya, dili kini sakop sa Exclusive Economic Zone (EEZ) sa nasud.
Hugot usab nga gisupak kini ni Philippine Coast Guard spokesperson Commodore Jay Tarriela, nga miimbita pa kang Marcoleta nga mosabay sa usa ka Maritime Domain Awareness flight aron personal nga makita ang tinuod nga kahimtang sa lugar.
Gawas kang Carpio, namahayag usab si Marcoleta nga andam siyang makigdebate kang Tarriela ug kang Prof. Jay Batongbacal sa UP Institute for Maritime Affairs and Law of the Sea.
Si Carpio nailhan isip usa ka hugot nga tigpanalipod sa katungod sa Pilipinas sa WPS, ilabi na human sa 2016 arbitral ruling nga nagpawala og bisa sa nine-dash line claim sa China.
Naglaum ang pipila ka mga grupo nga ang maong debate makatabang sa paghatag og klarong pagsabot sa publiko mahitungod sa legal nga basihan sa WPS ug sa kamahinungdanon sa pagpanalipod ug pagpadayon sa soberanya sa Pilipinas sa mga gilalisan nga teritoryo.
