Padayon ang pagdala sa Southwest Monsoon o Hanging Habagat og mga pag-ulan sa pipila ka bahin sa Luzon ug Visayas, samtang padayon usab nga gibantayan sa PAGASA ang duha ka Low Pressure Area o LPA.
Sumala pa sa PAGASA, taas ang posibilidad nga mahimong tropical depression sulod sa 24 oras ang LPA 08f nga anaa sulod sa Philippine Area of Responsibility o PAR.
Katapusang namataan kini 1,140 kilometro sa sidlakan sa Northern Luzon. Samtang, adunay medium nga posibilidad nga mahimong tropical depression ang LPA 08g nga anaa gawas sa PAR ug katapusang namataan 295 kilometro sa west-northwest sa Laoag City, Ilocos Norte.
Gipaabot ang labing kusog nga epekto sa Habagat sa Benguet, La Union, Pangasinan, Zambales, Bataan, Cavite, Batangas ug Occidental Mindoro, diin gilauman ang monsoon rains.
Lakip sa mga lugar nga gipasidan-an sa posibleng panagsa nga pag-ulan ang Metro Manila, Ilocos Sur, Abra, Tarlac, Pampanga, Bulacan, Nueva Ecija, Laguna, Rizal, Oriental Mindoro ug Antique.
Dugang pa niini, nasinati ang madag-umong kalangitan, uban sa kalat-kalat nga pag-ulan ug thunderstorms sa Negros Island Region, ubang bahin sa Luzon ug Western Visayas.
Gipahimangnoan ang mga residente sa mga apektadong lugar nga magmatngon tungod sa posibleng pagbaha ug pagdahili sa yuta, ilabina sa mga lugar nga delikado sa maong mga insidente.
Sa pagkakaron, padayon nga gisubay sa PAGASA ang lihok sa duha ka LPA ug ang posibleng pag-uswag niini ngadto sa tropical depression.
Sa kasamtangan, giawhag ang publiko nga magmonitor sa pinakabag-ong weather advisories ug mag-andam sa posibleng paglala sa kahimtang sa panahon.
