DAVAO CITY- Pasakahan ug kasong Arson ang usa ka hamtong nga lalaki human nga misunog sumala pa sa ilahang panimalay kagahapong adlawa nga nakadamay pa sa ilahang silingan.
Subay sa report gikan sa Talomo PNP, giila ang suspetsado nga si alias ARNOLD, 48-anyos, adunay kaipon ug construction worker nga residente sa residente sa Purok 11, Morio Morio, Brgy. Talomo Proper, ning dakbayan sa Davao.
Subay sa gihimong imbestigasyon sa mga otoridad, pasado alas nuybi ang takna kagahapon sa buntag, natigayon ang sunog sa Purok 1, Morio-Morio, Brgy. Talomo Proper, ning dabayan nga paspas sab nga mikuyanap sa kasikbit nga mga panimalay.
Sumala pa sa magtiayon nga nakakita ug biktima sa sunog nga si JANETH ARELLANO, 44-anyos, usa ka vendor ug JESSIE ARELLANO, 45-anyos nga silingan sa suspek, samtang naghigop sila ug kape niadtong tungura gawas sa ilahang balay, nakita niini ang suspek nga si alias Arnold nga nidagan pagawas sa balay niini ug kalit lang nga miulbo ang kalayo ug mikuyanap sa mga silingan.
Human sa maong panghitabo, nadakpan ang suspetsado sa mga otoridad ug sa dihang giimbistigahan kini, giangkon niini ang pagbubo ug gasolina sa tibuok niing balay dayon iyaha kining giduslitan.
Nasayran nga adunay problema ang nahisgutan sa iyahang kaipon nga anaa sa langyaw nga kanasuran human nga nag-myday kini sa iyahang social media account nga gikasuko sab sa suspek nga mao ang iyahang giselosan.
Dugay na sumala pa nga nagbahad ang nahisgutang suspek sa pagsunog sa ilahang balay. Dugang pa nga nagduda sab ang suspetsado nga gina-survielance kini sa iyahang balay gamit ang drone nga maoy hinungdan sa iyahang pagka-aburido gumikan sa iyahang pagselos ug pagduda.
Tungod sa iyahang gihimo, mokabat sa dusi ngadto sa kinse ka mga pamilya ang naalaot human nga nasunog ang dusi ka mga panimalay nga sa kinatibuk-an anaa sa P100,000 ang danyos sumala pa sa kapulisan.
Anaa na sa kostudiya sa Talomo PNP ang nahisgutang suspek.
