Masinati-an sa ekonomiya sa Pilipinas ang negatibong epekto sa nagpabilin nga giyera sa Middle East.
Sumala kang Emmanuel Leyco,president and chief economist of Credit Rating and Investors Services Philippines Inc.nga ang pagsaka sa presyo sa lana sa kalibutan resulta sa lisod nga supply gikan sa Strait of Hormuz, usa sa labing mahinungdanong ruta sa krudo sa tibuok kalibutan.
Gidugang pa niya nga posibleng mas mosamot ang sitwasyon kung matinuod ang worst-case scenario nga gihisgutan ni US Pres. Donald Trump, diin ang giyera mahimong molungtad pa og upat ka semana o labaw pa niini.
Tungod nagasalig lamang ang Pilipinas sa gi-import nga krudo sa mga pribadong kompanya, wala’y direktang kontrol matud pa ang nasud sa presyo sa lana.
Ang gihimo lamang sa gobyerno mao ang pagminus sa paggamit sa petrolyo ug paghagit sa pribadong sektor sa pagdaginot. Nagpasidaan usab ang mga business groups nga maapektuhan ang Philippine exports tungod sa posible nga embargo ug pagbabag sa supply chain, ilabi na kay daghang raw materials sa nasud gikan sa Middle East.
Sumala sa Philippine Chamber of Commerce and Industry (PCCI), dako ang epekto sa giyera sa energy security, presyo sa mga palaliton, ug kahimtang sa mga overseas Filipino workers (OFWs) sa rehiyon.
Ang padayon nga pagsaka sa presyo sa petrolyo nagdala og inflationary shock nga gibati sa mga panimalay ug industriya.
Kung magpadayon ang giyera, dili lamang presyo sa petrolyo ang mosaka kundili lakip usab ang presyo sa ubang nag-unang palaliton, samtang nagataas usab ang peligro sa supply chain sa exports.
