DAVAO CITY – Luwas ug anaa na karon sa ahensiya sa Department of Environment and Natural Resources (DENR) ang usa ka kuwago o Grass Owl nga una ng gi-turn over sa grupo sa mga batan-on sa Hagonoy Municipal Police Station.
Nasayran nga nakita ang maong owl sa Brgy. Sacub, Hagonoy Davao del Sur samtang pauli na ang mga batan-on.
Wala sab nagduha-duha ang mga nahisgutan nga i-turn over kini sa kapulisan sanglit kamatikdan nga nagluya ang langgam ug kinahanglan kini ug hinanali nga atensiyon.
Mismong ang mga personahe na sa Hagonoy MPS ang nagdala niini DENR –Digos City arun nga mahatagan ug igong pagtagad.
Nasayran nga sa milabay lamang sab nga tuig, usa ka batang agila ang na-rescue sab sa susama nga Barangay hinungdan nga gipahimangnoan ang mga residente nga makiglambigit gilayon sa otoridad sa higayon nga mudagsa ang mga talagsaon nga mga anggam sa lugar inay nga ikulong kini.
Kahinumduman nga hugtanon nga dili sa balaud ang pagkuha ug mga langgam nga talagsaon na lamang ang ilang kaliwat ug mamahimong mag-atubang ug bug-at nga silot ug multa sa higayon nga mapamatud-an.
