DAVAO CITY – Nanawagan ang mga sakop sa kapulisan nga kanunay imonitor ang mga anak ug siguruhon nga dili kini magdula ug mga butang nga mamahimon makabutang sa risgo sa ilang kinabuhi.
Una niini, nabawi sa mga sakop sa Bansalan, Davao del Sur PNP ang usa ka eksplosibo nga gidulaan sa duruha ka mga menor de edad nga lalaki sa milabay nga adlaw.
Una ng gibutyag ni Major Peter Glenn Ipong, hepe sa Bansalan PNP, nakadawat sila og tawag gikan kalabot sa mga bata nga nagdula ug Granada sa Purok 5, Barangay Mabuhay hinungdan nga miresponde sa lugar ang otoridad ug kumpirmadong gihuptan sa mga nahisgutan ang M26 fragmentation grenade.
Sa imbestigasyon sa otoridad, napunitan sumala pa sa mga bata ang maong Granada sa sapa nga nabilin sa maong dapit hinungdan nga ila kining gipunit.
Nagtuo ang kapulisan nga nahulog kini gikan sa militar atol sa ilang gilusad nga operasyon.
Anaa karon sa kustodiya sa Provincial Explosive and Canine Unit ang nahisgutan nga Granada.
Mapasalamaton na lamang ang otoridad nga wala mibusikad ang granada nga posibleng makapabutang sa risgo sa kinabuhi sa mga nahisgutan.
