Mipakig-uban ang Grab Philippines ug McDonald’s Philippines sa paghatag og tabang ngadto sa mga pamilya ug komunidad nga naapektuhan sa magnitude 7.8 nga linog nga niigo sa offshore Sarangani sayo ning buwana.
Lakip sa ilang gipahigayon ang paghatod og mga pagkaon ngadto sa local government command center sa General Santos City aron maapod-apod sa mga pamilyang nabakwit ug direktang naapektuhan sa maong kalamidad.
Dugang pa niini, naghatag usab ang Grab og relief packs nga adunay bugas, bottled water ug canned goods ngadto sa ilang GrabFood, GrabCar ug GrabTaxi driver-partners sa General Santos City ug Koronadal nga naapektuhan usab sa linog.
Gipalihok usab sa Grab ang GrabBayanihan aron matugotan ang mga user nga i-donate ang ilang GrabCoins alang sa earthquake relief pinaagi sa pakigtambayayong sa Angat Buhay, Jollibee Group Foundation, McDonald’s Kindness Kitchen ug World Vision.
Sa kasamtangan, gipasalig sa Grab ug McDonald’s nga magpadayon sila sa pagkoordinar sa mga lokal nga panggamhanan ug relief partners aron masuta pa ang dugang pang mga panginahanglan sa mga komunidad samtang nagpadayon ang rehabilitasyon ug pagbangon gikan sa epekto sa linog.
