DAVAO CITY- Buot ni Jose Nelson Sala Sr., ang municipal mayor sa Sta. Cruz, nga magtukod og goverment hospital sa lungsod ilalom sa iyang administrasyon.
Kana sumala usab ni Julius Paner, ang Tourism Investment Promotion Officer sa maong lungsod. Wala pay pinal nga plano alang sa municipal hospital apan matud ni Paner nga nakig-alayon na ang mayor sa Department of Health sa rehiyon aron tukion ang mga posibleng paagi sa pagtukod sa nahisgutang balay tambalanan sa lungsod sa Sta. Cruz.
Matud pa nga adunay mga butang nga kinahanglan ikunsidera apan paningkamotan sa mayor nga matukod ang maong ospital ilalom sa iyang termino.
Sa laing bahin, ang Local Government Unit aduna sab tulo ka bag-ong public buildings nga bag-ohay lamang giablihan alang sa publiko.
Matud ni Paner nga ang bag-ong Municipal Hall hingpit nang giokupahan sa lain-laing mga buhatan sa gobyerno. Ang bag-ong Trial Court Building gi-turn over na usab ngadto sa Municipal Trial Court sa miaging bulan ug giokupar na sa ilang mga buhatan.
Sa laing bahin, ang pagtukod sa Indigenous Peoples’ Building nagpadayon pa apan sumala ni Paner nga ang proyekto mahimong mahuman sa dili pa matapos ang tuig.
VIA|| Bryan Chin Abe
