DAVAO CITY – Naka-isolate na karon si Davao Oriental Governor Nelson Dayanghirang ug ang iyang asawa nga si Nanette human nga susama kini nga nagpositibo sa covid-19.
Sa gipadala nga mensahe sa gobernador, gikasubo niini nga gipahibali nga natakdan siya sa virus ug ang iyang asawa human nga migawas ang resulta sa ilang swab test.
Gitataw sa opisyal nga nakasinate sila ug mild lamang nga kalintura ug naka-desisyon sila nga magpa-swab test ug gilayon nga nag-isolate.
Normal lamang sumala pa kini sa usa ka public servant ilabi na nga si bisan kinsa na lamang ang iyang makahimamat nga mga tawo.
Nagpahigayon na sab karon ug contact tracing ang Provincial IATF sa mga ulahing naka-uban sa opisyal.
Nanawagan sab ang opisyal sa iyang mga nakahimamat nga mag-self quarantine dungan sa pagpangayo ug pasaylo sa mga nahisgutan.
