Andam na ang gobyerno sa higayon nga ibalik na sa nasud si kanhing kongresista sa Negros Oriental nga si Arnolfo A. Teves Jr. human kini maaresto sa Timor-Leste.
Matod pa sa Department of Justice (DOJ), bisan kanus-a andam silang motrabaho sa pagbalhin sa kustodiya kon mamahimong klaro na ang tanang aspeto sa iyahang pagkadakop.
Bisan pa man, gipahibalo sab sa DOJ nga hangtod karon wala pa makadawat ang gobyerno sa Pilipinas og bisan unsang legal o opisyal nga dokumento nga nagsaysay sa hinungdan sa pagdakop kang Teves.
Kahinumduman nga gibasura sa Court of Appeals sa Timor-Leste ang extradition request sa Pilipinas batok kang Teves.
Gawas sa pagkansela sa iyang pasaporte sa Department of Foreign Affairs, gideklarar usab siya nga usa ka terorista sa Anti-Terrorism Council (ATC).
Giatubang karon ni Teves ang mga kaso kalabot sa gikaingong pagpatay kang Gov. Roel Degamo ug siyam pa ka mga kaubanan niini.
