Gipasiugda ni Pangulong Ferdinand Marcos Jr. ang mga lakang sa gobyerno aron mapagaan ang epekto sa taas nga presyo sa lana ug pagkaon sa mga pamilyang Pilipino. Lakip sa maong mga lakang ang fuel subsidy alang sa sektor sa transportasyon, pagpaubos sa taripa sa imported rice ug pagpalapad sa P20 rice program.
Sumala pa sa Presidente, kapin 7.5 milyon ka pamilyang Pilipino ang nakabenepisyo sa maong mga programa. Gidawat usab ni Marcos nga nalangan ang paggasto sa gobyerno tungod sa hugot nga pagsusi sa nasudnong badyet. Bisan pa niini, gipadali na ang public spending aron maapas ang target sa dili pa matapos ang tuig.
Gipasabot usab sa Presidente nga nakaapekto sa hinay nga pagtubo sa ekonomiya ang krisis sa enerhiya ug kawalay kasigurohan sa tibuok kalibotan. Dugang pa niini, importante ang pagbalik sa kalig-on sa presyo sa mga palaliton ug sa ekonomiya aron madani ang dugang pamuhunan sa nasud.
Gibutyag usab niini, nga adunay mga lakang ang gobyerno aron manubag ang mga nalambigit sa korapsyon ug mapadayon ang pagsalig sa mga mamumuhunan sa Pilipinas.
