Giplano na sa gobyerno kung paunsa masustinar ang P20 nga bugas hangtod sa 2028, ang pagtapos sa termino ni Presidente Ferdinand Marcos Jr. Sumala ni National Food Authority (NFA) Administrator Larry Lacson, aduna nay pondo nga gilakip alang sa programa sa tuig 2026, 2027, ug sa tibuok 2028.
Lakip sa maong pondo ang kantidad nga ipangpalit sa lokal nga humay gikan sa mga mag-uuma. Matud pa ni Lacson, giandam na usab ang gidaghanon sa bugas nga ipagawas sugod 2026 hangtod 2028, pinasikad sa target nga konsumo sa mga pamilya nga mahatagan og akses sa barato nga bugas. Gipasabot kini ni Lacson atol sa iyang pagbisita sa pipila ka bodega sa NFA sa Mindanao ug sa pakighinabi sa mga mag-uuma ug konsumidor sa rehiyon.
Samtang, giklaro usab sa opisyal nga ang rice sustainability program naglangkob og kapin 15.6 milyon ka panimalay nga target makabenepisyo sa P20 Rice Program. Kini nga mga panimalay mao ang una nga nahisgutan nga maoy pinaka nanginahanglan tungod sa kakulang sa pinansyal nga kapasidad diin maoy gusto sulbaron sa kasamtangang administrasyon.
