DAVAO CITY – Gisugyot ni konsehal Mabel Acosta nga kinahanglan magpahimutang ug glow-in-the-dark emergency exit signs ang mga establisyemento sa siyudad human ang nahitabong sunog sa NCCC Mall.
Sa iyang nahimong privilege speech sa City Council, gipasabot ni Acosta nga ang nahisgutan nga lakang dakong tabang sa pipila ka mga suliran nga atubangon panahon sa emerhensiya ilabi na sa mga sarado nga lugar sama na lamang sa mga malls ug mga gambalay sa gobyerno.
Gikanayong ang mga photo-luminescent signs nga ipahimutang sa mga stairwells, pathways ug tanan nga mga emergency exits ang magsilbi nga giya sa katawhan aron nga mao kini ang sundon panahon sa emerhensiya sa higayon nga kalit na lamang nga mawagtang ang supply sa kuryente.
Gikanayong ang maong sugyot ang gikatakda nga ipailalom sa committee hearings.
