DAVAO CITY – Gibutyag ni Brgy. 23-C Captain Wating Usman nga aduna na silay gisubay karon nga lugar nga posibleng gitagoan ni Arani Hajiba usa ka pasyente nga positibo sa covid-19 apan misibat sa isolation facility sa queensland sa milabay nga adlaw. Sumala kang Brgy. Capt. Usman nakiglambigit na sila sa kapulisan aron panubayan ang lugar diin posibleng nahimutang karon si Hajiba. Wala sab gipadaplin sa opisyal ang posibilidad nga mobalik lamang gihapon sa ilang dapit ang nahisgutan sanglit kini sumala pa ang iyang mamatikdan sa higayon nga adunay salaod nga mahimo ang mga badjao. Kini sab ang rason nganong nagpagula sila ug reward nga P5,000 sa makahatag ug impormasyon diin nahimutang si Hajiba.
Gipasabot sa opisyal nga tumong sa pagtanyag niya ug reward sa makakita kang Hajiba nga mapugngan ang pagkatag sa virus sanglit delikado kini nga makatakod sa uban bisan pa man nga mild lamang ang sintomas niini.
Nakiglambigit na sab sumala pa siya purok lider diin nanimuyo si Hajiba nga kinahanglan motabang kini sa gobyerno aron nga dili na mosaka ang kaso sa covid-19 sa dakbayan.
Samtang mi-alma karon ang opisyal sa nadawat nga impormasyon nga pipila sumala pa sa mga residente sa lugar ang dili pasudlon sa mga banko nga sakop sa ilang dapit gumikan pa gihapon sa kaso sa Covid-19. Gipasabot ni Usman nga dili tanan area nga sakop sa ilang barangay ang apektado hinungdan nga mas maayo sumala pa nga makiglambigit kaniya ang kadumalahan sa mga banko aron nga masayod kini kung asa nga mga lugar ang apektado sa Covid-19.
