Aron nga malikayan ang mga dili maayong panghitabo atol sa Palarong Pambansa 2019, gibutyag sa opisyal ug organizers nga magpatuman sila ug pipila ka mga precautionary measures.
Mi-apela si Mikey Aportadera, chief sa City Sports Development Office, sa mga nagkadaiyang delegasyon ug coaches nga mohimo sab ug mga lakang aron nga masiguro ang ilang kaluwasan.
Kahinumduman nga namatay ang usa ka atleta nga si Hadia Eronico, 12 anyos, gumikan sa dengue dihang gipahigayon sa siyudad ang Davao Region Athletic Association (Davraa) sa milabay nga Enero.
Gitataw sab ni Aportadera nga susama nga measure sa milabay nga DAVRAA ang ilang i-apply sa Palaro nga usa sa pinakadako nga multi-sport sa student-athletes gikan sa 17 ka mga rehiyon sa nasod.
Gipahimangnoan sab ni Aportadera ang mga coaches nga kinahanglan ipabilin ang mga atleta nga hydrated ug magpalandong aron nga malikayan ang heatstroke.
Nanawagan sab si Department of Education Davao (DepEd 11) spokesperson Jenielito Atillo sa tanan nga mga physicians, sa local ug outside delegates, nga kinahanglan ipailalom sa tukma nga screening ang ilang mga atleta.
