DAVAO CITY – Gitawag sa usa ka Davao City-based medical doctor nga pagbugal-bugal ang gipahigayon nga drag racing event niining milabay nga adlaw ilabi na padayon pa gihapon nga nakasinate ang dakbayan ug kaso sa Covid-19.
Kahinumduman nga gi-post ni Dr. Anthony Tesoro ang hulagway sa gipahigayon nga car racing event sa milabay nga dominggo.
Gikuwestiyon niini ang maong aktibidad diin makita ang daghanang tawo nga nagtapok aron nga motan-aw.
Tungod niini nanawagan ang nahisgutan sa lokal nga kagamhanan nga angayan’g “consistent” kini sa pagpatuman sa hugtanon nga mga guidelines.
Nahimong viral ang nahisgutan nga post sa doktor ug nakadawat ug nagkadaiyang komento gikan sa mga netizens.
Sumala kang Tesoro, kanhi volunteer doctor ug nanguan kaniadto sa 911 Telemedicine program sa City Government, nadismaya siya sa iyang nakita gumikan kay wala sumala pa mitamud ang mga tawo sa physical distancing.
Gani aduna pa siyay namatikdan nga adunay nagdala ug bata sa maong aktibidad. Bisan tuod nga ang drag racing event usa ka non-contact sport ug gitugtan sa Inter-Agency Task Force on Emerging Infectious Diseases (IATF-EID) omnibus guideline, makonsidera pa gihapon kini nga dakong risgo tungod kay adunay mass gathering.
Mamahimo sumala pa nga ipadayon ang susama nga event apan dili kinahanglan nga mangimbita ug daghanan nga tawo.
Apan una ng gibutyag sa Davao Drag Racing Association President ug event organizer nga si Elben Pang, nga mitamod sumala pa sila sa health protocols ug gipatuman sab nila ang physical distancing sa mga tawo.
Nasayran nga si Pang ang emcee ug personal sumala pa nila nga gimonitor ang mga guidelines ayha gipatuman ang aktibidad.
