DAVAO CITY – Igo na lamang sa pagpatala sa buhatan sa kapolisan ang usa ka Ginang nga nanag-iya ug boarding house human nga gikawatan ug salapi ang usa sa iyang mga boarders.
Sumala pa sa usa ka Lourdes Senahon, 38 anyos, residente sa Barangay 23-C Mini-Forest Boulevard, ning dakbayan sa Davao nga niadtong Eenero 3, mi-reklamo kaniya ang usa sa iyang mga boarders, nga naila nga usa ka Cherry Mae Dela Cruz, 20 anyos, nagtungha sa koleheyo human nga iyang nasayran nga ang iyang kwarta nga mibalor ug katorse mil ka pesos nga gibutang sa usa ka garapon nahanaw.
Gi-review sa tag-iya sa boarding ang kuha sa CCTV ug nakita ang usa ka hamtong nga babaye nga misulod sa boarding house ug misulod sa lawak sa nahisgutan nga biktima ug gikuha ang nawagtang nga kwarta.
Ang mga biktima wala maka-ila sa suspetsadong kawatan nga misulod sa lugar.
Tinguha karon sa mga biktima nga madakpan na sa Sta. Ana PNP ang nahisgutan nga suspek aron nga dili na subli pa nga makapangbiktima.
