Gikompirma ni Capt. Jonel Castillo, Civil-Military Operations Officer sa 901st Brigade Philippine Army nga si Myrna Sularte, o mas nailhan nga si Ka Maria Malaya, ang top leader ug secretary sa Communist Terrorist Groups (CTG) Northeastern Mindanao Regional Committee (NEMRC) nga miyembro usab sa Political Bureau ng Communist Party of the Philippines (CPP), ang napatay sa engkuwentro batok sa tropa sa gobyerno sa bukid nga bahin sa Sitio Imelda, Barangay Pianing, Butuan City, Pebrero 12, alas 1:20 sa hapon.
Una nga natigayon ang sagunsun nga engkwentro nga nagsugod alas 6:10 sa buntag og alas 6:30 sa buntag kung asa narekober sa tropa ang nagkadaiyang gamit nga panag-iya sa grupo ni Malaya.
Sumala pa nga unang gipabuthan ang mga sundalo hinungdan nga natigayon ang engkwentro nga misangko sa pagkamatay ni Ka Maria Malaya, samtang dugang mga gamit usab ang nakuha niini.
Si Maria Malaya ang asawa sa namatay nga si Jorge “Ka Oris” Madlos, usa ka prominente nga tawo sa New People’s Army (NPA) National Operations Command (NOC), nga napatay kaniadtong Oktobre 2021 sa engkuwentro nga natigayon sa Bukidnon.
Milihok si Maria Malaya sa Caraga Region og Northern Mindanao, diin mao kini matud pa ang responsable sa daghang atrocities susama sa pagpatay sa mga sibilyan, pagguba sa mga proyekto sa gobyerno ug uban pa nga dili nindot nga gimbuhaton sa mga probinsya sa Surigao ug Agusan.
Si Malaya nga taga Bayugan City, Agusan del Sur, nga nalista isip most wanted NPA leaders sa nasod.
Nag-atubang kini og mga kasong kriminal susama sa rebellion, murder, multiple murder ug frustrated murder.
