Gipasabot sa Supreme Court nga walay kamatuoran ang miaging pasangil nga gidiskwalipika sa Judicial and Bar Council si DOJ Secretary Jesus Crispin Remulla sa iyang pag-aplikar alang sa posisyon sa Ombudsman.
Gipatin-aw sa tigpamaba sa Korte Suprema nga si Atty. Camille Ting nga wala pa magsugod ang JBC sa proseso sa pagpili ug pagsusi sa mga aplikante, ug wala pa usab mipagawas og opisyal nga listahan sa mga kandidato nga ilalom sa konsiderasyon sa konseho.
Mitumaw ang maong klaripikasyon human sa pagpangutana ug mga espekulasyon sa pipila ka sektor kabahin sa eligibility ni Remulla tali sa kasong giatubang niini.
Sumala pa sa Supreme Court, nga dili pa panahon aron sa paghusay sa bisan unsang isyu sa kwalipikasyon gumikan nagsugod pa lamang ang proseso ug anaa pa sa inisyal nga proseso sa pagpangolekta sa listahan sa mga aplikante.
Gipasabot sab niini nga mahinungdanon nga klarohon ang kahimtang sa proseso aron malikayan ang sayop nga impormasyon nga mahimong magkabahin-bahin sa opinyon sa publiko.
Ang Judicial and Bar Council nagpadayon sa pagtutok sa patas, hapsay, ug transparent nga pagpili sa mga kandidato sa tanang posisyon sa hudikatura, lakip na sa pagka-Ombudsman, aron masiguro nga ang mohulip sa posisyon adunay integridad ug tukmang kwalipikasyon alang sa maong responsibilidad.
