Nakomspika sa kapulisan ang kapin 121 ka master cases sa giingong iligal nga sigarilyo ug usa ka sakyanan nga gibiyaan sa daplin sa Tala River sa Purok 1, Barangay Taba, Carmen, Davao del Norte, karong Huwebes sa buntag, Hulyo 30, 2026. Sumala pa sa report sa Carmen Municipal Police Station (MPS), alas-3:40 sa kadlawon, midangop sa kapulisan si Elmar G. Dikere, 54 anyos, minyo ug Barangay Councilor sa Brgy. Taba, aron ipahibalo ang presensya sa mga master cases sa sigarilyo nga gibiyaang nagtambay sa daplin sa suba.
Dugang pa niini, gilayon nga gimando ni PMAJ Lope I. Cebreros III, Chief of Police, ubos sa direktang pagdumala ni PCOL Glenn G. Cristines, Provincial Director, ang pagpadala sa Intel Operatives ug Mobile Patrol Team aron pamatud-an ang maong impormasyon. Lakip sa gihimong aksyon sa kapulisan ang koordinasyon sa Regional Special Operations Group (RSOG) 11, Provincial Intelligence Unit (PIU)-DNPPO, ug DN MARPSTA nga gipangulohan ni PMSg John Michael B. Abitong.
Sa operasyon, narekober sa mga operatiba ang 121 ka master cases sa Bosqu cigarettes ug usa ka puti nga Mazda Transformer nga adunay plaka KBK-7068. Matud pa sa kapulisan, gibanabana nga nagkantidad og ₱3,025,000 ang narekober nga mga sigarilyo nga giingong nalambigit sa paglapas sa Republic Act No. 10643 o ang Graphic Health Warnings Law.
Sa kasamtangan, anaa na sa kustodiya sa Carmen Municipal Police Station ang tanan nga narekober nga ebidensya samtang nagpadayon ang imbestigasyon aron mailhan ang mga responsable sa maong kaso.
