Gisugod karon sa senado ang nagpadayon nga tensyon sa liderato human migawas ang giingong laing paglihok sa pagpuli sa gahom sulod sa mataas nga kapulungan, diin gitutok si senador sherwin gatchalian nga posibleng mopuli kang senador alan peter cayetano isip senate president.
Mipadayag sa kasamtangan si senador francis “kiko” pangilinan ug senador Panfilo “ping” Lacson nga si Gatchalian ang ilang nakitang posibleng makapahiusa sa mas daghang senador aron mapasig-uli ang pagkahiusa sa kapulungan.
Gipahayag ni Pangilinan nga ang “solid bloc 11” nagsuporta kang gatchalian isip lider nga mahimong mangulo sa senado, samtang gidugang pa niini ni lacson, giingon nga adunay abilidad ug kasinatian ang senador aron mabalik ang kredibilidad sa institusyon human sa sunod-sunod nga kontrobersiya sa miaging mga adlaw.
Gipasabot nga sa pagkakaron, wala pa gihapon pormal nga kumpirmasyon sa laing pag-ilis sa liderato, apan nagpadayon ang kahuyang sa bag-ong mayoridad nga naporma human natangtang sa puwesto si kanhing Senate President Vicente “tito” Sotto III niadtong Mayo 11.
Gitutokan usab sa senado ang sunod-sunod nga isyu lakip ang giingong pagpamusil sulod sa senado, mga pangutana sa seguridad, ug ang kontrobersyal nga pagtakas ni senador Ronald “bato” Dela rosa gikan sa kustodiya sa senado.Gipasabot usab ni Gatchalian nga andam siya modawat sa responsibilidad kung ipasa kaniya ang liderato, ilabi na sa gitakdang impeachment trial batok kang Vice President Sara Duterte.
Gidiin usab niini nga dako nga kadaot sa imahe sa senado ang mga kagubot nga nahitabo niadtong miaging semana. Gipasiugda sa minorya nga kinahanglan ibalik ang dignidad ug pagsalig sa publiko sa senado, samtang gisiguro nga patas ug walay pabor ang pagdumala sa impeachment trial batok sa bise presidente.
