DAVAO CITY – Gikumpirma sa Police Regional Office 11 nga nakapangalan sa usa sa mga kaabag ni Pastor Apollo Quiboloy sa Kingdom of Jesus Christ nga si Barangay Tamayong Captain Cresente Canada ang na-turn over nga 21 ka mga armas niadtong Mayo 25.
Kahinumduman nga natigayon ang maong pag-surrender ni Canada sa maong armas human nga nahitabo ang pag-surrender sa lain pang 19 ka mga armas nga gipanag-iyahan sa puganteng pastor, tulo ka simana ang nakalabay.
Sumala sa tigpamaba sa PRO 11 nga si PMAJ. Catherine dela Rey, kon ugaling nabaligya na ang mga armas ni Quiboloy ngadto sa laing tawo, panag-iyahan na kini sa mga nagpalit niini.
Subay sa taho, kni nga mga armas nga naglakip sa 18 ka mga handgun, duha ka rifle ug usa ka shotgun, lakip usab ang 14 ka bala sa kalibre .9mm nga pistola ug duha ka magazine sa CZ pistol ang dungan nga gi-turnover sa representante sa KOJC ug legal counsel nga si Atty. Israelito Torreon ngadto sa Criminal Investigation and Detection Group (CIDG) 11 sa church compound sa Barangay Sasa bandang alas-7:30 sa buntag niadtong Sabado, Mayo 25.
Kahinumduman nga usa si Canada sa lima ka kaubang akusado sa child abuse ug qualified human trafficking nga mga kaso nga gipasaka batok kang Quiboloy atubangan sa mga korte sa Davao ug Pasig.
Sa pikas bahin, nagpadayon ang monitoring sa tracking team nga gipadala sa PRO 11 aron pagpangita sa nagtago-tagong pastor.
Pagpaklaro sa kapulisan nga walay nadawat nga report ang PRO 11 mahitungod sa naglupad-lupad nga helicopter nga gituohang gisakyan ni Quiboloy.
Apan ilahang gipasalig nga samtang out of sight gihapon ang pastor sa publiko ning kasamtangan,nagpadayon ang kapulisan sa pagpangita kang Quiboloy.
