Gibatikos ni Senador Alan Peter Cayetano ang Department of Public Works and Highways (DPWH) tungod sa kapakyasan nga ipailawm sa preventive suspension ang mga opisyal nga giingong nalambigit sa “ghost” flood-control projects.
Giinsistir niya nga igo na ang paper trail ug litrato aron mailhan ang responsable, ug gipahibalo sab niini nga samtang wala pay suspensiyon, posible pa nilang papason ang ebidensya.
Gipasabot niya nga adunay klarong sistema sa dokumentasyon gikan sa distrito hangtod rehiyon, busa giawhag niya ang DPWH nga tukion kinsa sa chain of command ang nagberipika sa mga taho.
Gipahibalo pa niini nga tulo na ka semana sukad gibutyag ni Pangulong Ferdinand Marcos Jr. ang anomalya, hinungdan nga dili na angay maglangan pa ang DPWH.
Mitampo sab si Senador Erwin Tulfo pinaagi sa pagsulti nga dili si DPWH Secretary Manuel Bonoan ang problema, kondili ang mga opisyal ubos sa iyang mando.
Gidugang niya nga dili personal nga masubay sa kalihim ang tanang proyekto ug magsalig kini sa mga report sa ubos nga opisyal nga posible usab bakakon.
Nanghinaut siya og reshuffle sa mga district engineers aron maputol ang korapsyon ug giklaro nga si Pangulong Marcos lamang ang magbuot kon mapabilin o dili si Bonoan.
Samtang si Senador Rodante Marcoleta, mibatikos sa kakulang sa koordinasyon sa Riverbasin Control Office, nga mao unta ang gitahasan nga mag-integrate sa flood-control projects sa nasud.
Giingon niya nga dili magamit ang datos sa 100 river basin kon wala kini na-harmonize ug na-integrate sa proyekto sa DPWH.
Gilatid usab ni Secretary Bonoan nga hugot ang iyang baruganan batok sa korapsyon, ug bisan ibalhin ang usa ka district engineer sa lain lugar apan mapamatud-an nga siya gihapon ang responsable sa anomalya, manubag gihapon kini.
