Pormal nang milingkod isip bag-ong hepe sa Nasudnong kapulisan si PGen. Nicolas Torre III. Sa iyang assumption speech sa Kampo Crame kaganihang buntag, mapasalamaton si Torre sa Presidente sa pagsalig niini ngadto kaniya. Nagpasalamat usab siya kang retired PNP Chief Rommel Marbil sa mga maayong programa nga nasugdan niini.
Gisiguro sa bag-ong PNP Chief nga ipadayon niini ang mga nasugdan sa iyang gisundan. Misaad usab si Torre nga ubos sa Bagong Pilipinas, ilahang siguruhon nga luwas ang katawhan ug ang matag komunidad.
Gipresentar usab ni Torre ang tulo ka prayoridad sa iyang pagpangulo: Una, paspas nga serbisyo publiko, diin iyang ipatuman ang 3-minutes response time ug ang presensya sa kapulisan sa mga lugar. Ikaduha, panaghiusa ug taas nga morale sa sulod sa organisasyon, diin iyang ipatuman ang respeto sa matag usa ug leadership by example. Gisiguro sab niya ang suporta sa mga pulis nga nagtuman sa ilang katungdanan pinaagi sa mga pagbansay.
Matud pa niya, ang mga nagtrabaho angay nga ilhon ug pasidunggan, tungod alang kaniya, dili igo ang “pogi points” lamang. Ikatulo, accountability ug modernisasyon sa kapulisan. Gipunting ni Torre nga dili molusot kaniya ang sistema sa padrino apan ang angay hatagan sa posisyon mao ang adunay katakus ug angayan.
Hagit niini sa kapin 220,000 ka mga pulis, nga dili lamang puro istorya kundili ipakita kini sa buhat. Ipatuman ang balaod nga patas ug ihatag ang paspas nga serbisyo alang sa tanan.
