Gipahibalo sa National Bureau of Investigation (NBI) nga ilahang gisusi karon kon nakabisita ba sa ubang lugar sa Pilipinas, gawas sa Davao, ang amahan ug anak nga mga armado nga nalambigit sa Bondi Beach mass shooting sa Australia.
Sumala kang Mallari, ang NBI ilabi na ang Counterterrorism Division hugot nga nakigtambayayong sa Bureau of Immigration (BI) ug sa mga regional ug district offices niini sa tibuok nasud aron masubay pag-usab ang lihok ug mga biyahe sa mga suspek.
Una nang gikumpirma sa BI nga ang mga armado nga sila Sajid Akram ug Naveed Akram misulod sa Pilipinas niadtong Nobyembre 1, diin Davao ang nakalista nga katapusang destinasyon.
Milarga usab sila niadtong Nobyembre 28 sakay og Davao–Manila nga flight sa wala pa mopadulong paingon sa Sydney.
Gikataho usab nga gisusi sa Australian authorities ang tumong sa pagbisita sa mga suspek sa Pilipinas human sa Disyembre 14 nga pag-atake nga nakapatay og 16 ka mga tawo ug nakaangol og daghan pa atol sa Hanukkah celebration sa Bondi Beach.
Matod pa ni Mallari, ang imbestigasyon sa NBI nagpadayon nga gawasnon ug walay politikal nga pagpanghilabot.
Samtang, gisalikway sa Malacañang ang gitawag niini nga “makalilibog” nga mga alegasyon nga ang Pilipinas nahimong training ground sa Islamic State of Iraq and Syria (ISIS), hinungdan nga wala’y napamatud-ang report nga nakadawat og bisan unsang klase sa pagbansay ang mga suspek sulod sa nasud.
Una na usab nga gibutyag ni National Security Adviser Eduardo Año nga walay mga ebidensya nga nakadawat og military training ang mga nahisgutan.
Gidugang pa niini nga dili mahimong basehan ang pagbyahe sa nasud nga aduna silay gipahigayon ngapagbansay alang sa teroristang kalihukan.
