Gikompirma ni Donald Trump nga naigo ang gatusan ka mga target sa Iran sulod sa milabay nga 36 ka oras sukad gilusad ang “Operation Epic Fury.”
Sa video nga iyang gipaambit, gihulagway ni Trump ang maong pag-atake isip “pinakadako, pinakakomplikado, ug pinakalabaw nga military offensive” nga wala pa gayod masaksihan sa tibuok kalibutan.
Matod niya, apil sa mga naigo nga target ang mga pasilidad sa Revolutionary Guards ug ang Iranian Air Defense Systems.
Gikompirma usab ni Trump nga napatay ang Supreme Leader sa Iran nga si Ali Khamenei, nga iyang giakusahan nga responsable sa pagpatay sa liboan ka mga inosenteng tawo sa nagkalain-laing nasud.
Gipahibalo usab ni Trump nga napukan na ang tibuok military command sa Iran ug ang kadaghanan kanila gusto nang mosurender aron maluwas ang ilahang kinabuhi.
Nagpasidaan usab si Trump nga posible pang mudaghan ang US casualties samtang nagpadayon ang ilahang combat operations hangtod makab-ot ang tanan nilang tumong.
Gikompirma usab niya nga tulo ka miyembro sa US military service ang namatay taliwala sa pagbinayloay og pag-atake. Nagpafabfar kini og pakigduyog sa kasub-anan alang sa fallen American soldiers nga naghalad sa ilahang kinabuhi alang sa nasud.
Gibutyag pag-usab ni Trump nga dakong hulga sa mga Amerikano ang long-range missiles ug nuclear weapons sa Iran regime, ug dili nila tugotan nga magamit kini batok sa ilaha o sa ubang nasud.
Gipasigarbo usab ni Trump nga ang Amerika adunay pinakalig-on nga military nga nakita sa kalibutan, nga walay makatupong, apan iyang gipaklaro nga gusto nila kining gamiton alang sa maayong katuyoan.
Gibarugan usab niini nga makatarunganon ang ilahang gihimong aksyon aron masiguro nga dili na masinati-an sa mga Amerikano ang iyang gitawag nga “radical, blood-thirsty ug terrorist regime” nga armado og nuclear weapon.
Samtang nagpadayon ang tensyon, gilatag usab ni Trump ang posibleng gidugayon sa nagpadayon nga panagbangi batok sa Iran.
Matod niya, plano nilang ipadayon ang pag-atake sulod sa upat hangtod lima ka semana o labaw sa usa ka bulan.
Dili kini mahimong lisod alang kanila tungod kay daghan sila og suplay sa ammunition nga gitigom sa nagkalain-laing nasud.
