DAVAO CITY – Gikabutyag sa Davao City Police Office nga dili bastante ang ihap sa ilang mga myembro sa han-ay nga mututok sa mga kriminalidad nga nagapahinabo sa dakbayan.
Sumala ni DCPO Spokesperson nga si PCapt. Hazel Tuazon atol sa ekslusibong pakighinabi sa Bombo Radyo Davao, dili matud pa malukop sa kapin dos mil ka mga myembro sa Pulis Dabaw ang seguridad sa nagkadakong populasyon sa Davao City nga sumala pa sa Philippine Statistics Authority, anaa na sa 1.7 milyon ka tawo.
Sa maong ihap, adunay usa o duha ka libo alang sa usa ka myembro sa pulis.
Busa naghangyo karon ang kapulisan ngadto sa katawhan nga tabangan ang han-ay sa pagmintenar sa kalinaw sa tibuok dakbayan ilabi nang panahon karon sa Pasko diin sagad nagasaka ang kaso sa pagpangawat ug uban pang petty crimes.
Gipasalig sa Davao City Police Office nga gipanubayan gihapon sa kapulisan ang nagpahinabong imbestigasyon sa duha ka managlahing robbery incidents sa Talomo area, diin nakitaan na kini og mga managlahing persons of interest ug gituohan sab nga gipaluyohan sa usa ka sindikato.
Nagpahinumdom sab ang opisyal nga bantayan ang mga kinbabuhi, kabalayan ug kabtangan tungod sa subling pagbalik sa mga akyat bahay ug bukas kotse nga modus susama sa pipila ka mga insidente nga natala na dinhi sa dakbayan.
via || Bombo LJF
