Opisyal na nga gidawat ang Fresh Durian sa Egypt Human sa Malampusong Pag-abri sa China Market.
Human sa malampusong pag-abri sa merkado sa China, opisyal nang gidawat ang pag-export sa fresh durian gikan sa Pilipinas padulong sa Egypt, sumala sa pahibalo sa Department of Agriculture sa Bureau of Plant Industry (DA-BPI).
Sa usa ka paghinbi, gipadayag ni Flor De Hasmin Bayo, hepe sa Plant Quarantine Service sa Port of Davao (PQS-Davao), nga nakuha na sa fresh durian ang opisyal nga access sa merkado apan wala pa’y iskedyul sa shipment karon, tungod ang durian season kasagaran moabot sa bulan sa Hulyo ug Agosto.
Aron mapangandaman ang shipment, kinahanglan sa mga exporters sa Pilipinas nga masiguro nga ang mga importer sa Egypt makakuha og import permit pinaagi sa electronic system sa Egyptian Agricultural Quarantine.
Gipahibalo ni Bayo nga nasunod na ang tanang phytosanitary requirements, ug ang DA-BPI mag-isyu og phytosanitary certificate aron mapamatud-an nga ang durian walay peste.
Ang pagpadala sa durian sa Egypt magsugod lamang kung mahuman na kining nga mga proseso.
Sumala sa artikulo nga gipatik sa fructidor.com niadtong Mayo 18, ang fresh durian gikan sa Pilipinas opisyal na nga gi-clear alang sa export sa Egypt human sa dul-an duha ka tuig nga teknikal nga pagrepaso ug koordinasyon sa duha ka nasud pinaagi sa BPI.
Nagsugod ang proseso niadtong Hunyo 2023 sa dihang pormal nga nangayo ang Pilipinas og market access.
Sukad niadtong panahuna, nagtinabangay ang mga awtoridad sa duha ka nasud sa pag-ila ug pagtubag sa mga panginahanglanon alang sa pest risk analysis, phytosanitary standards, ug export procedures uban sa Central Administration for Plant Quarantine sa Egypt.
Ang bag-ong merkado alang sa durian gisuportahan usab sa pagtaas sa global demand, diin niabot ang export sa Pilipinas og 14,156.87 metric tons sa 2024, usa ka dako nga pagsaka nga 199.23 porsyento kung itandi sa 2023.
