Gipaguwa na sa Kamara ang pinal nga report sa Quad Committee niini, nga nag-akusa kang kanhi Pang. Rodrigo Roa Duterte ug sa iyang suod nga mga kaalyado nga sila Senador Ronald “Bato” dela Rosa ug Christopher Lawrence “Bong” Go sa pag-orkestra sa kampanya sa mga pagpatay nga giuyonan sa estado kon EJK, pagpanalipod sa mga drug trafficker, ug pagpadagan sa lapad nga korapsyon pinaagi sa mga illegal nga POGO.
Sa 66-ka panid nga report human sa 15 ka pampublikong pagdungog gikan Agosto 2024 hangtod Hunyo 2025, gibutyag sa mga Komitiba on Dangerous Drugs, Public Order and Safety, Human Rights ug Public Accounts nga ang giyera ni Duterte batok sa droga dili mabuwag sa liboan ka extrajudicial killings nga gihimo ug gi-rewardan sa estado.
Base sa report, ang mga extrajudicial killings resulta gayud sa gubat batok sa iligal nga droga.
Ang committee report gipirmahan sa Quad Comm lead chair nga si Surigao del Norte 2nd District Rep. Robert Ace Barbers ug sa mga co-chairs nga sila Santa Rosa City Rep. Dan Fernandez, Manila 6th District Rep. Bienvenido Abante Jr., ug Abang Lingkod Rep. Joseph Stephen Paduano.
Si Barbers ang nag-sponsor sa maong report.
Gipadayag sa mga gipanumpaan nga pamatuod nga ang mga promosyon ug mga importante nga posisyon sa PNP kanunay nga gihatag ngadto sa mga opisyal nga nakapatay sa mga giingong drug personalities.
Nadiskobre mismo sa Quad Comm, pinasikad sa pag-angkon sa kanhing Presidente, nga siya mismo ang nagsugo sa mga pagpamatay.
Si Dela Rosa mao ang PNP Chief niadtong panahona, samtang si Go giila nga facilitator sa reward payouts alang sa mga police operatives.
Gidasig sa Komite nga pasakaan og mga kasong kriminal alang sa murder ug crimes against humanity sila Duterte, Dela Rosa, Go, ug uban pang mga senior nga opisyal sa kapulisan.
Samtang girekomenda usab sa report nga imbestigahan ang gikaingon nga magkahiusang bank account sa kanhi Presidente ug sa iyang anak nga si Bise Presidente Sara Duterte, human sa pamahayag ni kanhi Senador Antonio Trillanes IV nga ang maong mga account nakadawat og pondo gikan sa usa ka drug-linked financier nga si Sammy Uy.
Naglantaw ang komite alang sa dagkong reporma, lakip ang mga kausaban sa Bank Secrecy Act, Anti-Dummy Law, ug Anti-Money Laundering Act; paghimo og tinuod nga independyenteng Internal Affairs Service para sa PNP; mga bag-ong balaod may kalabotan sa custodial deaths ug autopsy; ug bayad o reparasyon alang sa mga pamilya sa mga biktima sa giyera batok iligal nga droga.
