Gikanayon sa abogado ni kanhing Pang. Rodrigo Duterte nga nakakuha na sumala pa sila og pipila ka mahinungdanong impormasyon nga ilahang gigamit sa ilahang hangyo nga makuha ang interim release alang sa kanhing pangulo gikan sa International Criminal Court (ICC).
Kini ang nahimong pamahayag sa nasampit nga abogado atol sa paghinabi kaniya kabahin sa sitwasyon sa kaso sa kanhing pangulo nga sumala pa iyahang paningkamutan nga mahatag ang hangyo nga interim release.
Gidugang niya nga nadawat sumala pa niini ang pipila ka mga impormasyon nga nagpalig-on sa ilahang pagtuo nga sakto ang ilahang argumento.
Hinuon wala na mohatag og dugang detalye si Kaufman kabahin sa impormasyon, ug iyang gi-eksplikar ang ilahang miaging desisyon nga mangayo sa ICC og paglangan sa desisyon sa ilahang hangyo sa interim release.
Sumala pa ni Kaufman, kaniadto gidid-an sila nga maka-access sa ilahang gipangayo nga impormasyon, nga kritikal sa ilahang aplikasyon.
Apan giklaro ni Kaufman nga wala pa’y desisyon ang korte kabahin sa ilahang hangyo karon.
Gidugang usab niini nga ang hangyo alang sa interim release mamahimong molihok subay sa kompirmasyon sa mga gipasakang kaso atol sa pagdungog karong Setyembre.
Samtang gipasabot sa nahisgutan nga ang interim mao ang pagbuhi sa akusado hangtod nga magsugod ang trial kon pagtaral o hangtod nga ang mga huwes magdesisyon sa laing paagi.
Katungod sumala pa kini sa matag suspetsado nga buhian, tungod kay hangtod dili pa napamatud-an nga siya sad-an, siya gihapon magpabilin nga usa ka inosente.
Apan iyahang gidugang pagpasabot nga ubos sa standard nga ‘reasonable ground,’ aduna’y tulo ka mga giilang risk factors nga kasagaran gigamit sa korte aron balibaran ang interim release: una, ang risgo nga mosibat ang suspetsado; ikaduha, ang risgo nga makasamok sa mga testigo ug ebidensiya; ug ikatulo, ang risgo nga magpadayon sa pagbuhat og krimen.
