Gisang-at na sa International Criminal Court (ICC) ang tulo ka kaso sa pagpatay batok kang kanhi Presidente Rodrigo Roa Duterte subay sa gipagula na dokumento sa ICC miadtong Lunes, Setyembre 22, 2025, kalabot sa giingong mga extrajudicial killings nga nahitabo sa iyang termino isip mayor sa Davao City ug isip Presidente sa Pilipinas.
Subay sa Public Redacted Version of “Document Containing the Charges” nga gipagawas sa Pre-Trial Chamber I sa ICC, giila si Duterte nga kriminal nga responsable sa mosunod: Unang kaso: Pagpatay isip crime against humanity sa Davao City atol sa iyang pagka-Mayor, nga may kalabotan sa 19 ka biktima gikan sa mga insidente tali sa 2013 hangtod 2016.
Ikaduhang kaso: Pagpatay isip crime against humanity batok sa giingong “high-value targets” sa lain-laing dapit sa Pilipinas atol sa iyang pagka-Presidente, nga may kalabotan sa 14 ka biktima tali sa 2016 hangtod 2017.
Ikatulong kaso: Pagpatay ug attempted murder isip crimes against humanity sa barangay clearance operations sa lain-laing lugar sa nasud atol sa iyang pagka-Presidente, nga adunay kalabotan sa 45 ka biktima (43 patay ug 2 nakaluwas) tali sa 2016 hangtod 2018.
Ang mga kaso gisang-at pinasikad sa mga artikulo 7(1)(a), 25(3)(a) hangtod (c), ug 25(3)(f) sa Rome Statute, diin giingong si Duterte nag-order, nag-induce, ug/o nagtabang sa mga pagpatay.
Ang Office of the Prosecutor ubos kang Deputy Prosecutor Mame Mandiaye Niang mao ang naghimo sa pormal nga pagsang-at sa kaso.
Kini giilang usa ka milestone case sa ICC nga nagpunting sa sitwasyon sa Pilipinas, ug posibleng mopahamtang og internasyonal nga hustisya batok sa usa ka kanhing Presidente nga giakusahan sa crimes against humanity.
Sa laing bahin, adunay gipagula nga impormasyon nga adunay nasud nga andam mudangop kang Duterte kon kini ipahamtang sa ICC.
Gawas pa niini, mitungha usab ang hungihong nga wala na matud pa kini sulod sa ICC jurisdiction.
Gani, naglaom ang pipila ka mga Dabawenyo nga tinuod kini ug nga makalikay si Duterte sa posibleng kaso.
Sa atong pakighinabi sa pipila kanila, ilang giila nga nabalaka sila sa kalihokan ug giangkon nga “ang Ginoo na ang bahala kang FPRRD.”
Giila usab nila ang abilidad ug pagka-lider sa kanhi Presidente nga nakahatag og seguridad ug kauswagan sa syudad ug sa nasud.
Sa katapusan, nagpadayon ang pag subaybay sa kalibutan mahitungod sa mosunod nga lakang sa ICC ug sa kahimtang ni Duterte usa ka kaso nga makahatag og kabalaka mga Pilipino ug kasaysayan sa Pilipinas.
