DAVAO CITY – Hingpit na nga milingkod sa iyang katungdanan si kanhi Davao City Government accountant Rizalina Justol isip bag-ong chair sa Commission on Audit (COA).
Kahinumduman nga ang nahisgutan maoy mihulip kang kanhi COA chairman Michael G. Aguinaldo nga natapos na sa iyang termino sa milabay nga Pebrero 2, 2022.
Una na sab nga gipagula ni Executive Secretary Salvador Medialdea ang appointment letter alang kang Justol nga gilagdaan ni Pangulong Rodrigo Duterte isip ad interim chairperson sa Commission on Audit (COA) diin matapos ang termino niini isa Pebrero 2, 2029.
Gipasalig sab ni Acting Presidential Spokesman ug Cabinet Secretary Karlo Alexei B. Nograles Nograles nga pabilin ang suporta sa gobyerno sa pagpaningkamut sa COA aron lamang masiguro ang transparency ug accountability sa paggamit ug government funds.
Dihang gipangutana kalabot sa malversation charges nga giduso batok kang Justol gumikan sumala pa sa sayup nga paggamit sa P2.93 billion nga public funds sukad 2003 hangtud 2006, gikanayon ni Nograles nga tanan matud pa nga mga opisyal nga gihatagan ug posisyon sa gobyerno ang mipailalom sa hugtanon nga pagsukit-sukit partikular na ang ilang credentials, experience, achievements, ug accomplishments.
Kahinumduman nga nagsilbi si Justol isip Deputy Executive Secretary for Finance and Administration ilalom sa Office of the President ug nagsilbi sab isip accountant sa lokal nga kagamhanan dinhi sa dakbayan ilalom sa liderato ni Mayor ug karun Pangulong Duterte ayha kini gituboy sa iyang bag-ong katungdanan.
