Gipahibalo sa Department of the Interior and Local Government (DILG) nga adunay pagkunhod ang mga insidente sa mga “focus crimes” sa nasud sa unang katunga sa tuig 2025.
Sa usa ka pahayag, gibutyag ni DILG Secretary Jonvic Remulla nga nakatala og “dakong” pagkunhod sa mga krimen sama sa pagpanglugos, physical injuries, ug pagpangawat (robbery) sukad Enero 1 hangtod Hunyo 6 karong tuiga, kung itandi sa susamang panahon niadtong 2024.
Matod pa sa kalihim, ang insidente sa rape mikunhod og 31.85%, samtang ang physical injuries mikunhod og 30.21%, ug ang robbery mikunhod og 26.47%.
Ang mga “focus crimes” gikonsidera nga seryosong mga kalapasan sa balaod nga kasagaran mahitabo ug direktang hulga sa kahimtang sa seguridad sa publiko.
Samtang, gilambigit usab sa kalihim ang pagkunhod sa krimen sa nagpadayon nga kampanya batok sa kriminalidad, lakip ang pagdakop sa mga loose firearms nga miresulta sa pagkakumpiska sa kapin 12,000 ka iligal nga armas ug pagkasikop sa kapin 5,000 ka mga suspek, diin kadaghanan kanila kasamtangang gitaral na ang kaso sa korte.
