DAVAO CITY – Siento porsyento nang nakumpleto ang 1.6-kilometer Tagum City Flyover Project sa Davao del Norte human ang kapin upat ka tuig.
Busa, mamahimo na kining maagian sa mga motorista karong katapusang adlaw sa Setyembre.
Sumala sa Tagum City Planning and Development Office, kasamtangang ginalimpyuhan ang flyover isip pagpangandam sa pagpagamit na niini sa mga motorista.
Gisugdan niadtong tuig 2017 ang nasangpit nga proyekto, nga adunay tumong nga masulbad ang kahuot sa dagan sa trapiko sa Dakbayan sa Tagum.
Gigahinan og 2.7 billion pesos ang maong proyekto, ug ubos kini sa Build, Build, Build Program sa Duterte Administration. Kamatikdan nga mas sayo pa sa projected date nga October 2021 ang pagpaabli sa flyover sa trapiko.
Gikanayon kaniadto ni Department of Public Works and Highways kon DPWH XI nga si Dean Ortiz nga makatabang sa pagpalambo sa Tagum City ang maong proyekto.
Apan, dunay pipila ka mga negosyante ang wala kauyon sa proyekto tungod sa right of way issues.
