Mitala ang Department of Health (DOH) og dugang 26 ka mga insidente nga gumikan sa pabuto kagahapon, nga miresulta na sa kinatibok-ang ihap nga 69.
Gisugdan sa DOH niadtong Disyembre 22 ning tuiga, ang pagmonitor sa nasud bahin sa mga insidente nga may kalabotan sa pabuto.
Subay sa record sa ahensya, 58 sa mga biktima mga menor de edad nga anaa sa edad 19 paubos, samtang ang nahibilin anaa sa edad nga 20 pataas.
Gibutyag usab nga kadaghanan sa mga biktima mga bata o kabatan-onan.
Sumala sa DOH, 86% sa mga nasamdan migamit og iligal nga pabuto susama sa “boga” o PVC cannon. Dugang pa niini, nga 74% sa mga biktima aktibo nga migamit og pabuto sa dihang nahitabo ang insidente.
Subay sa datos, 65 sa mga biktima mga lalaki samtang upat ang babae.
Nagpahinumdom ang DOH nga ang paggamit sa pabuto mamahimong hinungdan sa seryoso nga kadaot susama sa pagka-putol sa bahin sa lawas, pagkabuta, pagkasamad, pagkahilo, paso, permanente nga kadaot sa baga, ug bisan kamatayon.
Dugang pa sa ahensya, kasagaran nga modaghan ang ihap sa mga samad nga gumikan sa pabuto sa mga adlaw nga padulong ang Bag-ong Tuig ug madungagan pa kini sa mismong adlaw sa Bagong Tuig.
Niadtong milabay nga tuig, gatusan ka mga insidente sa mga kadaot nga may kalabotan sa pabuto ang gitala human sa selebrasyon sa Bag-ong Tuig.
