Gitan-aw nga makatabang aron mapamatud-an nga angay tugutan ang interim release ni kanhi Pangulong Rodrigo Duterte ang findings sa Senate Committee on Foreign Relations nga gipangulohan ni Senador Imee Marcos nga nag-imbestiga sa giingong iligal nga pagdakop sa kanhi Pangulo padulong sa The Hague, Netherlands.
Gipasabot sa lead defense counsel sa kanhi Pangulo nga si Nicholas Kaufman nga mahimo nga ma-counter sa report sa komitiba ang argumento sa prosekusyon sa International Criminal Court (ICC) nga nagpakita nga delikado nga makalingkawas o molayas ang kanhi Pangulo tungod sa iyang pagpanukwahi sa hurisdiksiyon sa ICC.
Kahinumduman nga sa 10 ka panid nga dokumento nga gisumite sa ICC Pre-Trial Chamber I niadtong miaging tuig, nangayo ang kampo sa kanhi Pangulo nga tugutan sila nga motubag sa argumento sa prosekusyon batok sa ilahang aplikasyon alang sa interim release.
Gibutyag sa defense team nga ang pagdumili sa kanhi Pangulo nga mosurender sa giingong “unconstitutional” nga pagdakop ug ang pag-angkon sa iyang legal team nga kini usa ka “extraordinary rendition” nga dili unta gamiton batok sa iyang hangyo alang sa interim release tungod kay gikanayon sa report sa Senate Committee ang “domestic unlawfulness” sa pagdakop sa kanhi Pangulo.
Kalabotan usab niini, nangayo ang defense team nga isumite ang findings sa komitiba ug opisyal nga ilakip sa rekord aron mabalansi ang giingong “factual gossip” nga gipresentar sa Prosekusyon nga wala magikan sa husto ug tukmang imbestigasyon, kundili gikan lamang sa mga mantalaan.
Kahinumduman usab, subay sa findings sa Senate committee nga gipatik sa website sa Senado, nga posibleng nakalapas og mga criminal ug administrative offenses ang ubang tag-as nga opisyal sa gobyerno sa pagdakop sa kanhi Pangulo niadtong Marso 11 ug sa pagdala kaniya sa The Hague, Netherlands sa susamang adlaw.
