Gitinguha sa National Bureau of Investigation (NBI) nga pasakaan og kaso ang mga Filipino vloggers nga nagpadayon sa pagpakatag og sayop nga impormasyon sa internet. Gibutyag ni NBI Director Jaime Santiago ang maong pahayag human sa pagtaas sumala pa sa ihap sa mga nagpakalat og fake news nga nagatarget sa mga taas nga opisyal sa gobyerno, lain-laing ahensiya, ug uban pang kasaligan nga tinubdan sa balita.
Gihimong ehemplo sa kanhing Regional Trial Court judge ang usa sa iyang bag-ong pahayag diin giusab matud pa sa mga vlogger ang konteksto. Matod ni Santiago, sa usa ka forum, iyang gibutyag nga posible usab kasuhan ang mga Pilipinong anaa sa gawas sa nasud kung mapamatud-an nga sila ang nagpakatag sa sayop nga impormasyon. Kung igawas na ang ilahang warrant of arrest, mamahimo dayon silang dakpon pagbalik nila sa Pilipinas.
Apan, gibutyag niini nga gibali-bali sa ubang mga vlogger ang iyang mensahe ug gipagawas nga usa kini ka hulga gikan sa NBI director batok sa mga Overseas Filipino Workers (OFW). Tungod niini, daghang OFW ang nasuko kaniya bisan wala pa nila masabti ang tinuod nga konteksto sa iyang giingon.
Gipasabot ni Santiago nga kinahanglan nang pugngan ang mga vlogger nga padayon sa pagpanglimbong ug pagpakatag sa sayop nga impormasyon, ug patubagon sila sa ilahang binuhatan, tungod kung pasagdan lamang, siguradong motaas pa ang ihap sa mga biktima sa fake news.
