DAVAO CITY – Posibleng maduot pa sa iyang salaud nga nahimo si kanhi Davao Regional Chief Intelligence Unit chief Leonardo Felonia human ang pagpresenta sa bag-ong tulo pa ka mga witness.
Kahinumduman nga tulo ka mga police officers ang gipresenta sa prosecution team atol sa pagpadayon sa murder case sa Cebu-based businessman Richard King niining milabay nga adlaw.
Una ng gipangunahan ang prosecution team ni Atty. Deolito Alvarez, legal counsel sa King family.
Ang mga bag-ong witness naila nga sila si SPO3 Arrubio, SPO2 Medina, ug PO2 Salazar nga mitudlo kang Felonia nga maoy utok sa pagpatay sa negosyante.
Kahinumduman nga gipusil si King sulod sa Davao branch office sa iyang Vital-C company nga nahimutang sa Sobrecarey Street Bo. Obrero kaniadtong Hunyo 12, 2014.
Apan gikanayon ni Atty. Caesar Europa, legal counsel ni Felonia, nga adunay panagsumpaki sa mga testimonya sa testigo apan wala na niini gipangbutyag.
Kahinumduman nga gawas kang Felonia, nag-atubang sab ug murder trial sila si Paul Dave Labang, ug mag-igsuon nga sila si Rommel ug Rodel Dela Cerna nga nagkanayong gi-hire sila ni Felonia.
Una ng mi-angkon si Labang nga siya ang nagsilbi nga gunman samtang si Rommel Dela Cerna ang lookout ug si Rodel ang nagmaneho sa getaway motorcycle.
Ang pagdungog sa kaso gikatakda nga magpadayon sa adlaw nga lunes, Marso 13 ug 14. Samtang laing pagdungog usab ang ipahigayon sa Marso 20 ug 21.
