DAVAO CITY – Laing pahimangno na sab ang gipagula karon sa Food and Drug Administration (FDA) aron nga ipahibalo sa tanan nga mga konsumante batok sa pagpalit ug lima ka mga food supplements nga wala nakapasar sa ilang quality evaluation.
Gitumbok sa FDA ang mga produkto sama sa Jacquilou’s Herbal Tea Malunggay Tea, Nurture Grace Extra Virgin Coconut Oil 350ml, AcneCare Lactoferrin with Linumlife Extra and Zinc Gluconate Dietary Supplement, MS for Male Tablet ug CL Pito-Pito Herbal Capsule.
Gikanayong ang nahisgutan nga mga food products wala mipailalom sa hugtanon nga ebalwasyon ug testing process sa FDA. Wala sab sumala pa na-isyuhan sa ahensiya ug Certificate of Product Registration ang nahisgutan nga mga produkto aron masiguro ang kalidad niini.
Gani, mamahimo sumala pa nga mohatud ug dili maayo sa panglawas ang pagtumar niini nga walay pagtugot gikan sa mga eksperto.
Gipahimangnoan sab ang publiko nga dili mopalit sa nahisgutan nga mga produkto ug gitambagan sab ang mga establisyemento nga likayan ang pagpakatag niini hangtud nga walay tukma nga pagtugot gikan sa FDA.
