Nagtuo ang usa ka opisyal sa Department of Justice (DOJ) nga daw gihagit ni Pastor Apollo Quiboloy ang gobyerno sa Pilipinas ug Estados Unidos gumikan sa pagpasaka niini ug certificate of candidacy (COC) aron mudagan sa pagka-senador sa 2025 midterm elections.
Gipahayag ni DOJ Spokesperson ug Assistant Secretary Mico Clavano, ang pagsubmitar ni Quiboloy sa kandidatura, ang usa ka hagit sa gobyerno sa Pilipinas ug sa Estados Unidos nga mupasaka na lamang ug extradition.
Dugang gipahayag pa niini nga dili pwede mahimong senador ang usa ka akusado sa human trafficking ilabi na nga adunay substantial evidence nga gihimo sa nahisgutan.
Apan giklaro usab ni Clavano nga wala pa gipangayo sa gobyerno sa Amerika ang extradition kang Quiboloy.
Apan mamahimong magamit kuno ni Quiboloy nga proteksyon kung mahimo kining senador.
Nag-atubang si Quiboloy ug mga kasong Child abuse ug human trafficking sa dakbayan sa Davao ug Pasig City.
Anaa usab kini sa most wanted list sa Federal Bureau of Investigation (FBI) gumikan sa mga nagkadaiyang kaso.
Samtang gipaneguro usab sa Philippine National Police (PNP) nga dili makagamit ug social media o bisan unsang gadget si Quiboloy aron mangampanya online.
