Naglaum si kanhi Senator Leila de Lima nga magmaayo na si kanhi Pangulong Rodrigo Duterte aron makabaton kini ug kusog nga tubagon ang tanang akusasyon batok sa iyaha, ilabi na sa extra judicial killings nga adunay kalabutan sa war on drugs.
Gipanghinaot ni De Lima nga unta mahimong maayo na ang panglawas sa kanhi Presidente ug matubag niini ang mga isyu.
Kung kahinumduman, wala nakatambong kagahapong adlawa sa pagdungog sa Quad Comm si ex-PRRD gumikan kay dili maayo ang gibati niini ug gikinahanglang magpahulay, subay na usab sa short notice nga gipadala sa abogado sa kanhi Presidente sa Komite.
Gihulat usab ang mahimong testimonya ni De Lima sa komite ilabi na nga usa kini sa nahimong biktima sa war on drugs sa Duterte administration.
Samtang sa laing bahin, gibakwi sab ni Police Lieutenant Jovie Espenido ang iyahang testimonya kaniadto nga ilambigit si de Lima sa drug trade sa nasud, atol sa gipahigayong pagdungog sa Kamara kagahapong adlawa.
Kahinumdumang si Espenido ug si Self-confessed drug lord nga si Kerwin Espinosa maoy nagpadayag sa ilahang testimonya kaniadtong tuig 2016 aron ilambigit sa illegal drug trade si kanhi Senadora Leila De Lima.
