Gidepensahan ni kanhing DA Secretary Emmanuel Piñol ang negosyanteng si Sammy Uy, nga gitawag niini nga suod nga higala human kini gingalan ni kanhing Senador Antonio Trillanes IV isip sumala pa “bigtime drug lord” sa impeachment hearingbatok kang VP Sara Duterte kagahapong adlawa.
Sa usa kapahayag, gibutyag ni Piñol nga nakurat kini sa pagkalambigit sa pangalan sa iyang giingong “old friend,” ug giingon nga dili makatarunganon ang pagdaot sa publiko base sa ilahang koneksyon o “friendship” kang Kanhing Pang. Rodrigo Duterte.
Gibutyag niini nga ang akusasyon batok kang Sammy Uy nga nalambigit sa iligal nga droga aron lamang dauton ang pamilyang Duterte maoy usa ka “political black propaganda” nga layo ra sa kamatuoran.
Matod pa niya, makapamatuod niini ang mga “Davao City old-timers,” nga bisan pa og daw igsoon na ang pagtagad sa Presidente kang Uy, wala kuno niya giabuso ang ilahang relasyon sa panahon sa iyang pagka-Pangulo.
Posible, matod ni Piñol, nga nakabenepisyo si Uy sa negosyo tungod sa iyahang pagkasuod sa Presidente, apan dili siya kombinsido sa alegasyon nga nalambigit kini sa iligal nga droga.
Gidugang pa niya nga bisan pa siya usa ka kanhing politiko ug nakasabot sa “dula sa pulitika,” dili sumala pa niini madawat ang pagdaot sa dungog sa inosenteng tawo alang lamang sa politikal nga katuyu-an, nga iyang giingon nga sayop ug makadaot sa dungog sa tawo.
