Misalang na sa witness stand si kanhing state auditor sa Commission on Audit – Intelligence and Confidential Funds Audit Office (COA-ICFAO) Atty. Roderick Wamil isip ikatulong saksi sa House Prosecution Team atol sa ika-11 nga adlaw sa impeachment trial batok kang Bise Presidente Sara Duterte niadtong Lunes, Agosto 3, 2026.
Sumala pa sa prosecution, mitutok ang testimonya ni Wamil sa Article I sa Articles of Impeachment nga may kalabotan sa alegasyon sa sayop nga paggamit sa kapin P612.5 milyon nga confidential funds sa Office of the Vice President (OVP) ug Department of Education (DepEd). Dugang pa niini, gipasabot ni Wamil ang proseso sa COA sa pag-audit sa confidential funds, lakip ang pagrepaso sa liquidation reports ug mga may kalabotan nga dokumento.
Gipangulohan ni prosecution counsel Atty. Lorna Kapunan ang direct examination kang Wamil, diin iyang gipahibalo nga ilhon sa saksi ang 50 ka exhibits nga naglakip sa mga acknowledgment receipts sa fourth quarter sa OVP. Sa wala pa ang iyang testimonya, nauna nang mitestigo ang mga kanhing opisyal sa Land Bank aron ipakita ang pagpagawas o encashment sa dagkong kantidad sa pondo.
Sa pagkakaron, gitakdang mosunod nga motestigo ang kasamtangang supervising auditor sa COA-ICFAO nga si Celine May Del Campo niadtong Martes, Agosto 4.
