Gikumpirma sa Department of Justice (DOJ) nga aduna na kini gigunitang mga impormasyon aron madakpan si kanhing Bureau of Corrections Chief Gerald Bantag, kanhing Presidential Spokesperson Harry Roque, ug uban pang mga pugante.
Kini mismo ang giklaro sa maong ahensya nga ilang gitutukan ang mga nadawat nilang impormasyon.
Matod ni Assistant Secretary Mico Clavano, kinsa karon mao ang tigapamaba sa DOJ, nga ila gayud paningkamotan nga madakpan na ang mga nagatago ug naningkamot nga makalikay sa balaod.
Apan giingon usab sa DOJ nga bisan pa man kini nahimong isyung nasudnon, gipasalig gihapon niini sa publiko nga dili nila pasagdan ang ubang mga indibidwal nga adunay kasong kriminal sa nasud.
Gipasabot usab ni Clavano nga wala silay ginauna nga priority number kung si kinsa ang una nilang dakpon.
Matod pa niya, kung kinsa man ang posibleng madakpan, buhaton dayon nila kini aron mapatubag sa balaod ang angay nga manubag.
Dugang pa sa opisyal, wala silay target kung kinsa ang unahon nga tawo, ug bisan ang oras o petsa sa pagdakop, dili nila kini ginaplano nga sunod-sunod.
Ang ilang trabaho mao ang pagpangolekta pa og dugang nga ‘intelligence’ aron madakpan, bisan pa og dungan, ang mga pugante nga nagtago gikan sa balaod.
Si kanhing BuCor Chief Gerald Bantag, hangtod karon, gipanid-an pa sa mga otoridad tungod sa iyang pagkalambigit sa kaso sa pagpatay.
Gibutyag nga siya ang ‘mastermind’ sa likod sa pagpatay sa mamamahayag nga si Percival ‘Percy Lapid’ Mabasa niadtong tuig 2022.
Samtang si Atty. Harry Roque ang anaa sa gawas sa nasud, partikular sa The Hague, Netherlands, alang sa iyang aplikasyon sa asylum.
Kini adunay kalabotan sa mga kasong gipasaka batok kaniya tungod sa sumala pa pagkalakip sa iligal nga operasyon sa POGO dinhi sa Pilipinas.
