Patay ang usa ka estudyante nga drayber sa motorsiklo human nga nabangga sa motor nga adunay sidecar pasado alas Siyete ang takna niadtong nakalabayng gabii.
Subay sa report gikan sa Traffic Enforcement Unit sa Davao City Police Office, giila ang biktima nga si Rolando Gonzales Lupiba, residente sa Manuel Guianga, Tugbok District, ning syudad sa Davao.
Subay sa gihimong imbestigasyon sa kapulisan, nagmaneho ang biktima sa iyahang motor sa dalan nga padulong sa Barangay Mintal ug pagawas sab sa highway gikan sa Rambutan Street ang motor nga adunay sidecar nga gimaneho sa usa ka 72 anyos nga Senior citizen nga si Gorriceta Albino Java, nga residente sa Purok 6, Tugbok, samtang adunay sakay ang pasahero nga si Zita Polinar Javanes, 64 anyos nga residente ra usab sa maong lugar.
Apan kalit sumala pa nga gibanggaan sa motorsiklo ang side car nga hinungdan sa pagkatagak niini sa ilahang gisakyan ngadto sa karsada ang mga biktima.
Samtang ang biktima nga si Lopiba ang nabunal usab sa karsada nga maoy hinungdan sa iyahang kamatayon.
Samtang nakaangkon og mga pangos ug bun-og sa kalawasan ang mga pasahero nga sila Java ug Javanes nga dali nga gidala sa ospital sa mga personahe sa Central 911.
Nasayran nga ang sidecar walay OR/CR samtang ang namatay nga drayber sa motor nga si Lopiba ang wala sumala pa’y driver’s license.
