Nahiluna na ang patay’ng lawas sa usa ka 21-anyos nga estudyante nga si alyas Laurence, ulitawo, nga nagpuyo sa Wellspring Village Phase 2, Catalunan Pequeño, Davao City, nga nakabsan sa kinabuhi human malambigit sa disgrasya sa Davao-Bukidnon Road, atbang sa usa ka Mall sa Mintal, pasado alas 3 sa kaadlawon ( Enero 7, 2026).
Sumala sa report sa kapulisan, nalatayan ang biktima sa usa ka Daihatsu Wagon utility nga gimaneho ni Gregorio III Agopitac Doringo, 28-anyos, taga-Calinan District.
Subay sa inisyal nga imbestigasyon sa kapulisan, nagdagan ang duha ka sakyanan sa managlahing direksyon apan pag-abot sa dalan atbang sa Gaisano Capital, nawad-an og kontrol ang motoristang si Alqueres tungod sumala pa sa kakusog sa dagan.
Hinungdan nga natumba ug na-slide ang motorsiklo sa kalsada sulod sa kapin usa ka gatos ka metros.
Sa epekto sa impact, nalagpot si Alqueres padulong sa pikas lane diin siya nalatayan sa tuo nga ligid sa utility vehicle.
Ang biktima nakaangkon og grabeng samad sa lain-laing parte sa iyang lawas.
Gitabangan siya sa rescue team sa Barangay Sto. Niño ug gidala sa Davao Adventist Hospital, apan gideklarang dead on arrival alas 3:28 sa kaadlawon.
Dugang pa sa kapulisan, ang motorsiklo sa biktima gikuha sa iyang kauban ug gidala sa wala pa mailhing direksyon, samtang ang utility vehicle nagpabilin sa lugar sa insidente alang sa dugang imbestigasyon.
