Wala na matabang pa ang usa ka estudyante nga lalaki human nga nalumos kini atol sa pagkaligo sa dagat sa dakbayan sa Mati.
Subay sa report gikan sa Mati City Police Station, nahitabo ang insidente pasado alas Siete kagahapon sa buntag sa usa ka beach resort nga nahimutang sa Bgry.Bobon dakbayan sa Mati.
Giila ang biktima nga si Oliver Labrador Del Rosaryo nga nagpuyo sa Brgy. Mayo, Mati City.
Subay sa report sa mga otoridad nga girespondehan sa Mati City Disaster Risk reduction ang Management Office ang maong panghitabo human nga nakadawat kini og tawag.
Sa pagresponde sa mga rescuers, wala na matabang pa ang kinbuhi sa biktima.
Sumala pa sa inisyal nga imbistigasyon nga ang biktima nabikugan atol sa iyahang pagkaligo nga maoy hinungdan sa iyahang pagkalumos.
Sa pagkakaron, padayon pa usab nga giimbistigahan ang maong panghitabo.
Samtang sa laing bahin, gikwestyon usab karon sa kabanay sa biktima ang pamunuan sa beach resort kung nganung wala kini life guard nga magsilbi sumala pa nga magpahimangno og magbantay sa mga nangaligo.
Wala pa usab magpaguwa og pamahayag ang management sa beach resort gumikan sa maong panghitabo.
