Nagpahimangno karon ang Department of Health (DOH) sa publiko kabahin sa epekto sa heat illness, ilabi na sa mga tawo nga moadto sa mga baybayon karong Semana Santa.
Gipasaka na usab sa DOH ang tanang pampublikong ospital ug health facilities sa tibuok nasud ngadto sa “Code White” alert aron masiguro nga andam ang mga health personnel sa pagresponde sa bisan unsang posibleng emergency sa kahimsog ilabi na karong panahon sa Kuwaresma. Matod ni Health Secretary Ted Herbosa, sobra ang kainit sa panahon karon, busa kinahanglan nga mag-amping ang atong mga kababayan.
Gipahimangnoan usab ni Herbosa ang publiko nga kung mopaingon sa baybayon o ubang pampublikong lugar, kinahanglan: Gamiton ang sunscreen. Magpabiling hydrated (inom ug igo nga tubig), Likayan ang taas nga exposure sa init sa adlaw,Kung adunay tawo nga makasinati og taas nga body temperature, kinahanglan magpabugna dayon. Ang mga ilhanan sa heat illness mao ang; grabe nga kauhaw, bugnaw nga singot bisan init ang lawas, Kini nga mga sintomas mahimong moresulta sa pagkawala sa panimuot kung dili kini hatagan sa pagtagad.
Gihatagan og gibug-aton ni Herbosa nga ang kasagarang maapektuhan sa hilabihang kainit mao ang mga tigulang ug kabatan-unan. Samtang gipahimangnoan usab ni Herbosa ang mga ginikanan nga bantayan gayud ang ilahang mga anak kung mangaligo sa dagat o bisan asa nga lugar aron malikayan ang pagkalumos
