Gipahibalo ni Senador Jinggoy Estrada sa sesyon sa Senado kagahapong adlawa nga si Chief Presidential Legal Counsel ug kanhing Senate President Juan Ponce Enrile ang kasamtangang anaa sa intensive care unit (ICU) tungod sa pneumonia.
Sa iyang pamahayag, nanawagan si Estrada og mga pag-ampo alang sa dali nga pagkaayo ni Enrile, nga nailhan isip usa sa labing taas ug labing dugay nga nanerbisyo nga opisyal sa kasaysayan sa politika sa Pilipinas.
Bisan pa niana, wala gipadayag ni Estrada kung asa nga ospital gi-confine ang 101-anyos nga opisyal.
Si Enrile, nga miserbisyo isip Chief Presidential Legal Counsel ni Pang. Ferdinand Marcos Jr., padayon nga gisubaybayan sa publiko tungod sa iyang taas nga edad ug taas nga karera sa serbisyo publiko.
Samtang nagpaguwa usab og pamahayag ang kamagulangang anak sa kanghing Senate Prersident nga si Jack Ponce Enrile nga nagpabilin nga buhi ug naa sa Intensive Care Unit (ICU) ang iyahang amahan.
Kini nga pamahayag ang migawas pasado alas Nuybi kagabii tungod sa mga mikuyanap nga mga balita nga mipanaw na ang kanhing senador.
Dugang pa usab ni Jack Enrile nga tinuod nga anaa sumala pa kini sa ICU ang iyahang amahan ug sumala pa anaa sa kritikal nga kondisyon tungod sa Pneumonia ug siya posibleng mopanaw bisan unsang orasa na lamang.
Gipaklaro usab niini nga ang iyahang amahan nagpangidaron na og 103 anyos kung subayon ang rekord sa Aglipayan Church sa Cagayan, nga nagpakita nga natawo siya duha ka tuig sa sayo kumpara sa opisyal nga dokumento sa gobyerno nga 101 anyos.
