Halos nangamuyo na matud sa iyang pamilya si Chief Presidential Legal Counsel ug kanhi Senate President Juan Ponce Enrile nga makapauli na siya sa iyahang panimalay ug dili na niya buot nga igahin ang katapusang mga adlaw sa ospital.
Sumala pa sa anak ni Enrile nga adunay edad nga 103 ka tuig ug karon anaa pa gihapon sa intensive care unit (ICU) tungod sa sakit nga pneumonia.
Sumala ni kanhi Senador Gregorio “Gringo” Honasan, padayon nga ginabantayan sa iyang pamilya ug mga doktor ang kanhing lider sa Senado.
Gibutyag usab sa anak ni Enrile nga si Katrina Ponce Enrile nga dili maayo ang kahimtang sa iyang amahan ug nagpabilin kini sa kritikal nga kondisyon.
Kahinumduman nga niadtong Martes, gipahibalo ni Sen. Jinggoy Estrada atol sa sesyon sa Senado nga gamay na lamang matud pa ang “paglaom nga makaluwas” si Enrile, hinungdan nga naghiusa ang mga senador sa pag-ampo alang kaniya.
Si Enrile nailhan nga usa sa mga opisyal nga adunay labing taas nga serbisyo sa gobyerno, gikan pa sa iyang panahon isip Defense Minister panahon sa Martial Law, hangtod sa pagkahimo niyang Senate President, ug pagkahuman, Chief Presidential Legal Counsel ni Presidente Ferdinand Marcos Jr.
Samtang nagpasalamat usab ang pamilya sa kanhing senador sa mga suporta ilabi na sa mga pag-ampo nga gitanyag sa mga katawhan alang sa kaayuhan og kaluwasan sa opisyal.
